Forsvarsmenn Alcan í Straumsvík sögðu Hafnfirðingum ósatt í aðdraganda álverskosninganna um framtíðarhorfur fyrirtækisins yrði ekki af stækkun. Forsvarsmenn Alcan í Straumsvík mótmæltu ítrekað í fjölmiðlum þeirri skoðun margra Hafnfirðinga að líklega yrði fyrirtækið starfandi í Hafnarfiði til ársins 2014 eða 2024. Starfsmönnum Alcan var uppálagt að segja Hafnfirðingum í persónulegum samtölum frá yfirvofandi lokun Alcan yrði ekki af stækkun . Það var óheiðarlegt, það var lágkúrulegt, það var skammarleg framkoma gagnvart bæjarbúum sem þurftu að taka erfiða ákvörðun.

Eftirfarandi grein birtist á www.mbl.is í dag:

Rekstur álvers í Straumsvík tryggður til 2037

Landsvirkjun segir, að með samkomulagi, sem náðst hafi við Rio Tinto Alcan, eiganda álversins í Straumsvík, um tæknilegar endurbætur á álverinu, hækki raforkuverð og rekstur álversins sé tryggður til lengri tíma en ella eða til ársins 2037.

Rio Tinto Alcan hugðist stækka álverið um tæplega 200.000 tonna ársframleiðslu með byggingu tveggja nýrra kerskála. Þessi áform náðu ekki fram að ganga þar sem íbúar í Hafnfirði lögðust gegn þeim þegar kosið var um skipulagstöllögu er sýndi þessa stækkun.

Rio Tinto Alcan átti síðan í viðræðum við Landsvirkjun um orkukaup til nýs álvers sem staðsett yrði á Reykjanesi eða í Þorlákshöfn. Þau áform voru lögð á hilluna eftir að stjórn Landsvirkjunar gerði fyrrnefnda samþykkt.

Landsvirkjun segir, að Rio Tinto Alcan sjái hins vegar fram á möguleika á að auka afkastagetu núverandi álvers án stækkunar með því að framkvæma vissar tæknilegar endurbætur á því. Við það aukist framleiðslugetan um allt að 40.000 tonnum á ári og aflþörfin um 75 MW.

Viðræðum sem átt hafa sér stað milli RTA og Landsvirkjunar um þetta mál er lokið með samkomulagi sem jafnframt inniheldur ákvæði um endurnýjun á eldra rafmagnssamningi og segir það afar mikilvægt. Landsvirkjun hefur ákveðið að hefja framkvæmdir við Búðarhálsvirkjun að nýju til að uppfylla samninginn og samning við Verne Holding um rafmagnssölu til netþjónabús sem fyrirtækið hyggst koma upp á Keflavíkurflugvelli.

Landsvirkjun segir einnig, að viðræður standi nú yfir um orkusölu til nokkurra fyrirtækja sem yrðu væntanlega staðsett í Þorlákshöfn. Landsvirkjun áformar að anna orkuþörf þeirra með byggingu virkjana í neðrihluta Þjórsár. Takist að ná samningum við þau munu skapast nokkur hundruð ný störf á svæðinu.

Heimild: www.mbl.is 8. ágúst 2008

Sól í Straumi skorar á bæjarstjórn Hafnarfjarðar að hafna tilleitan Landsnets um að loftlínur fyrir álver í Helguvík fari í gegnum bæjarlandið. Þegar tekist var á um stækkun álversins í Straumsvík kom fram gríðarleg andstaða við þau línumannvirki sem til hefði þurft.

Ef álver rís í Helguvík þarf umfangsmikla orkuflutninga í gegnum fjölmörg sveitarfélög sem eiga ríkra hagsmuna að gæta. Auk Hafnarfjarðar þyrftu Vogar, Grindavík, Reykjavík, Kópavogur, Garðabær og Ölfus að breyta skipulagi sínu. Hvað Hafnarfjörð varðar þá yrði um að ræða breytingu sem innifelur hluta af þeim áformum sem Hafnfirðingar hafa nú þegar hafnað með lýðræðislegum hætti. Af virðingu við íbúa og kjósendur er þess krafist að öllum tillögum um loftlínur fyrir hugsanlegt álver í Helguvik verði alfarið hafnað.

Sól í Straumi

Nú er nokkuð um liðið síðan námufyrirtækið Rio Tinto keypti Alcan Inc. og breytti nafni félagsins í Rio Tinto Alcan. Rio Tinto Alcan er nú eitt af fimm framleiðslusviðum (product groups) Rio Tinto. Á heimasíðu www.alcan.com eru nýjir eigendur búnir að breyta nafni fyrirtækisins úr “Alcan Inc.” í “Rio Tinto Alcan”. Væntanlega verður nafni álversins í Straumsvík breytt á næstu misserum úr “Alcan á Íslandi hf.” í “Rio Tinto Alcan á Íslandi hf”. Ekki er enn búið að uppfæra heimasíðu Alcan á Íslandi eftir eigendaskiptin en væntanlega verða þau kynnt í næstu ÍSAL tíðindum. Eftirfarandi merki er að finna á heimasíðunni www.alcan.com

Á www.mbl.is í dag er vitnað í Ísal-tíðindi þar sem fram kemur að í Straumsvík verður nú farið í miklar fjárfestingar til þess að auka afköst verksmiðjunnar um 22% (ca. 36.000 tonn)

“Unnið er að því að auka framleiðslu álvers Alcans á Íslandi í Straumsvík í núverandi kerskálum. Er það gert með því að auka rafstrauminn sem fer um hvert ker og með því mun heildarframleiðslan í Straumsvík aukast um 40 þúsund tonn á ári. Þetta er meðal þess sem kemur fram í desemberútgáfu ISAL-tíðinda – fréttabréfs Alcans á Íslandi.

Til þess að af aukinni framleiðslu geti orðið þarf að ráðast í miklar fjárfestingar, að því er segir í pistli Gunnars Guðlaugssonar, framkvæmdastjóra stækkunarsviðs. Meðal annars þarf að bæta við nýrri þurrhreinsistöð og ofni í steypuskála. „Í skautsmiðju og skautskála þarf að ráðast í miklar endurbætur því stækka þarf skautin frá því sem nú er. Með þessum aðgerðum mun framleiðni álversins aukast og mun það því verða samkeppnishæfara en nú er. Samhliða tæknilegum undirbúningi straumhækkunarinnar er unnið að því að tryggja raforku til verkefnisins.” Lesa afganginn af þessari færslu »

Í aðdraganda kosningana um stækkun álversins í Straumsvík þann 31. mars sl. kom margoft fram hjá stjórnendum og starfsmönnum álversins í Straumsvík að ef fyrirtækið fengi ekki stækkun yrði því lokað. Forstjóri fyrirtækisins kynnti undir þessa orðræðu í Kastljósinu nokkrum dögum fyrir kosningar og gaf í skyn að í raun væri líklega mjög fá ár eftir yrði ekki af stækkun. Góður hagnaður af rekstrinum þýddi alls ekki að í Straumsvík yrði áfram starfsemi. Meðlimir í Sól í Straumi bentu í aðdraganda kosninganna ítrekað á að þessi málflutningur væri ekki trúverður og nú hefur komið í ljós að hér var um ódýran hræðsluáróður að ræða. Svo virðist sem að yfirmenn Alcan hafi visvítandi dreift röngum upplýsingum um framtíðarhorfur fyrirtækisins fengi það ekki stækkun bæði til starfsmannana sinna og Hafnfirðinga allra. Lesa afganginn af þessari færslu »

Í inngangi að úrskurði Persónuverndar frá 2. júlí sl. um ábyrgð Alcan á Íslandi hf. á söfnun persónuupplýsinga í aðdraganda íbúakosninganna um stækkun álversins í Straumsvík kemur fram að fyrirtækið lagði að starfsmönnum sínum að safna sérstaklega upplýsingum um meðlimi Sólar í Straumi og skrá í miðlægan gagnagrunn (heimild: Úrskurður Persónuverndar nr. 2007/258, www.personuvernd.is ).
Lesa afganginn af þessari færslu »

Nú hefur Persónuvernd úrskurðað að Alcan í Straumsvík bar ábyrgð á skráningu persónuupplýsinga um Hafnfirðinga í aðdraganda kosninganna í Hafnarfirði 31. mars 2007. Til þess að lesa úrskurðinn þá ýttu hér

Í inngangi að úrskurði Persónuverndar er sagt frá símtölum sem stofnunin fékk frá starfsmönnum Alcan í Straumsvík. Þar kemur fram að fyrirtækið uppálagði starfsmönnum sínum að safna upplýsingum um meðlimi Sólar í Straumi og skrá þær í miðlægan gagnagrunn.

“Dagana 14. og 15. mars sl. bárust Persónuvernd símtöl frá mönnum sem kváðust vera starfsmenn Alcan á Íslandi hf. Þeir greindu frá því að starfsmenn félagsins hafi fengið tilmæli um að safna upplýsingum um a.m.k. 10 nágranna sína eða vini og skoðanir þeirra á fyrirhugaðri stækkun álversins í Straumsvík. Fyrst og fremst hafi menn verið beðnir um að safna upplýsingum um meðlimi samtakanna Sólar í Straumi. Fram kom að starfsmenn skyldu skrá sig inn á vefsíðu með notendanafni og lykilorði sem þeim hafði verið úthlutað og færa upplýsingarnar þar inn. Mennirnir vildu ekki leggja inn erindi í eigin nafni af ótta við uppsögn.” (Heimild. www.personuvernd.is, úrskurður í máli í máli nr. 2007/258 ).

Það er auðvitað ljóst að skoðanir meðlima Sólar í Straumi gagnvart stækkun álversins lágu ljósar fyrir á þessum tímapunkti. Það hljóta því að hafa verið aðrar upplýsingar sem fyrirtækið sóttist eftir um einstaklingana í samtökunum. Hvaða upplýsingar það voru hefur ekki enn verið svarað. Lesa afganginn af þessari færslu »

Heildarkostnaður við kosningabaráttu Sólar í Straumi, vegna kosninga um stækkun álversins í Straumsvík, 31. mars sl. var 3.841.339 kr. Tekjur á móti voru 3.829.985 kr. og rekstrartap því upp á 11.354 kr. Stærstu útgjaldaliðirnir voru útgáfa dreifiefnis og birting auglýsinga í fjölmiðlum, alls 3.193.972 kr. Framlag einstaklinga til samtakanna nam um einni milljón króna eða um 25% allra tekna Sólar í Straumi. Til samanburðar styrkti Hafnarfjarðarbær samtökin um 450.000 kr. eða um 12% af heildartekjum. Yfirlit yfir kostnað og tekjur er að finna hér fyrir neðan. Lesa afganginn af þessari færslu »

Heimsókn forsvarsmanna Alcan í Kanada hefur valdið nokkru fjaðrafoki undanfarna daga. Morgunblaðið birti í morgun eftirfarandi forsíðufrétt:

“Álver á landfyllingu

Alcan á Íslandi kannar nú þann möguleika að stækka álver sitt í Straumsvík með því að byggja landfyllingu út í sjó. Hugsanlegt er að slík landfylling gæti tengst fyrirhugaðri uppbyggingu og hafnarframkvæmdum hjá Hafnarfjarðarhöfn. Þetta segir Lúðvík Geirsson, bæjarstjóri í Hafnarfirði, en hann átti í gær fund með erlendum og innlendum ráðamönnum Alcan, þeirra á meðal Rannveigu Rist, forstjóra Alcan á Íslandi, og Michel Jacques, forstjóra Alcan Primary Metal Group.
Lesa afganginn af þessari færslu »

Í dag kl. 14:00 fóru fulltrúar Sólar í Straumi, Sólar á Suðurnesjum og Sólar á Suðurlandi á fund Þórunnar Sveinbjarnardóttur umhverfisráðherra í Alþingishúsinu og afhentu henni sameiginlega áskorun frá samtökunum sem fer hér á eftir.

Við þetta tækifæri færðu gestirnir Umhverfisráðherra þrjú sólblóm, eitt frá hverjum samtökum og óskuðu henni velfarnaðar í nýju starfi.
Lesa afganginn af þessari færslu »