Álbræðslan í Straumsvík og hafnfirskur vinnumarkaður
25. nóvember 2006Það er áhugavert að velta fyrir sér álbræðslunni í Straumsvík og áhrif hennar á hafnfirskan vinnumarkað. Starfsmenn Alcan í Straumsvík eru u.þ.b. 500 talsins. Síðasta vor voru 46% þeirra Hafnfirðingar eða u.þ.b. 230 starfsmenn (skv. upplýsingum í tölvupósti frá upplýsingafulltrúa Alcan í Straumsvík 8.mars 2006).
Auk þessara starfsmanna má segja að starfsemi þriggja fyrirtæki í bænum hafi beinlínis orðið til vegna starfsemi Alcan en það eru fyrirtækin Kerfóðrun ehf, Stímir hf og Blendi ehf. Því miður hef ég ekki tölur um það hversu mörg störf hjá þessum fyrirtækjum eru til vegna starfsemi Alcan í Straumsvík í dag.
Á heimasíðu Hafnarfjarðarbæjar er að finna upplýsingar um fjölda starfa í Hafnarfirði og þróunina á 7 ára tímabili frá 1998 til 2005 (birt 15. febrúar 2006). Árið 1998 voru 6.830 störf í Hafnarfirði, árið 2005 voru þau orðin 8.500. Í gögnunum er bent á að þessi gögn miði við heimilisfang fyrirtækjanna og því séu starfsmenn tryggingafélagana, olíufélagana, bankana og annara fyrirtækja sem eru með aðalstöðvar í Reykjavík ranglega skráðir utan Hafnarfjarðar. Hugsanlega er hér um nokkur hundruð störf til viðbótar að ræða.
En hvað er hafnfirskur vinnumarkaður að vaxa mikið á hverju ári?
Á þessu ofangreindu 7 ára tímabili fjölgaði þeim um 1.670 en það eru tæplega 239 störf á ári. Ef hlutfall Hafnfirðinga eftir stækkun bræðslunnar árið 2011 eða 2012 verður það sama og það er í dag, þá starfa eftir stækkun 391 Hafnfirðingur í álbræðslunni. Það verður þá u.þ.b. 4,0% af öllum störfum í Hafnarfirði. Ef við stækkum hinsvegar ekki álverið má gera ráð fyrir að u.þ.b. 2,3% starfa í bænum árið 2012 verði í Straumsvík.
Höfundur Pétur Óskarsson
Skrifað undir Almennt um stækkun |
nóvember 25th, 2006 at 15:26:00
Álverið í Straumsvík er ekki álbræðsla. Álið er skilið frá súrefni með rafgreiningu. Ágætt að halda því til haga.
800 milljónir í gjöld til Hafnarfjarðar hljóta að koma að einhverjum notum. Árslaun frá 3.500.000.- til 5.000.000.- hljóta að vikta eitthvað, jafnvel í Hafnarfirði.
Kveðja
nóvember 25th, 2006 at 20:06:21
Blessaður Tryggvi,
ég þakka þér kærlega fyrir athugasemdina. Ég veit ekkert áhugaverðara en að ræða þessi mál við þá sem eru fylgjandi því að við stækkum álbræðsluna í Hafnarfirði.
Nú er ég ekki sérfærðingur í álbræðslu en sú starfsemi sem er í Straumsvík hefur verið kölluð á íslensku “álbræðsla” alveg frá því að þessi aðferð til álframleiðslu kom hingað fyrst. Ég ætla ekki að deila um réttmæti þess en í samningi Ríkistjórnar Íslands við Isal frá árinu 1966 er orðið “álbræðsla” kynnt til sögunar sem grundvallarhugtak yfir starfsemi Isal í Straumsvík. Samningurinn er hér til hægri á síðunni í sérstakri útgáfu Iðnaðarráðuneytisins.
Hinni spurningunni um 800 milljónir og árlaun starfsmanna vil ég svara eða skoða í sérstökum pistli.
Með kveðju og von um að þú látir meira í þér heyra hér á síðunni.
Pétur Óskarsson
desember 2nd, 2006 at 01:17:39
Verksmiðjur eins og sú í Straumsvík eru á ensku kallaðar “aluminium smelters”. Það er auðvitað laukrétt að í þeim er ál og súrefni skilið að með rafstraumi en til að svo megi verða þarf að leysa samband þessara frumefna, súrál, upp í svonefndri krýólitlausn sem þarf að hita uppí næstum 1000 °C og álið sem losnar við rafgreininguna er vissulega bráðið. Ég held því að álbræðsla sé hreint ekkert öfugmæli.