Ég mun segja JÁ og aftur já
30. December 2006Ég er einn þeirra sem hafa gert upp hug sinn varðandi leyfi til handa álverinu til stækkunar. Ég mun segja JÁ og aftur já, ef ég get!
Mér er hreinlega orðið misboðið vegna afstöðu þeirra sem eru orðnir svo samdauna velmeguninni, að þeir halda að það þurfi ekki lengur hráefnaframleiðslu til að halda uppi lifi “standard” á Fróni. Það eru t.o.m . einstaka Íslendingar sem hafa sagt það beinum orðum, að það þurfi ekki mikið lengur á sjómennsku og tilheyrandi verkamannavinnu að halda; af því að viðskiptagróði muni halda “standardinum” uppi!
Ég get vel skilið afstöðu þeirra Vinstri Grænu sem eru á meðal ykkar mótmælendanna. Þeir eru alveg eins og kommarnir sem trúðu á Stalín og ismann sinn framyfir rauða dauðann hér í denn og munu sjálfsagt aldrei skipta um skoðun. Svona afstöðu ber þó að virða; hversu fáránlega vitlaus sem hún er, en berjast mót henni með rökum.
Ég hef meiri áhyggjur gagnvart þeim nýríku nútímans sem hafa sannarlega notið góðs af hráefnaframleiðslu fortíðarinnar til að mynda auð og völd og ætla að nýta þetta allt saman, kannski bara vegna þess að útsýnið út um stofugluggann þeirra muni skerðast!
Kveðja,
HH
Skrifað undir Rök Hafnfirðinga með stækkun |
January 4th, 2007 at 22:23:40
ég þakka þér kærlega fyrir skeytið og stuðningsyfirlýsingu þína við stækkun álversins í Straumsvík.
Aðeins með því að ræða saman og fara yfir öll rök með og á móti komumst við Hafnfirðingar að bestu niðurstöðu þegar til kosninga kemur.
Í hópnum sem að ég tilheyri, Sól í Straumi er fólk með ólíkan bakgrunn og með ólíkt gildismat og hefur því ólíkar ástæður fyrir andstöðu sinni við stækkunaráformin. Í hópnum er fólk sem starfað hefur með flokkunum í bænum og svo fólk sem ekki hefur starfað í pólitík.
Ég undirritaður er sjálfstæðismaður og atvinnurekandi. Ég á og rek lítið ferðaþjónustufyrirtæki með starfsemi í München í Þýskalandi og í Reykjavík. Hjá okkur starfa 12 manns, þar af eru 10 með háskólapóf og tveir faglærðir ferðaskrifstofustarfsmenn. Yfir sumartímann starfa hjá okkur til viðbótar u.þ.b. 12 íslenskir
leiðsögumenn. Okkar litla fyrirtæki skilar íslensku samfélagi u.þ.b. einum milljarði í gjaldeyristekjur á ári. Stærstur hluti þess ábata fyrir íslenskt samfélag verður til á íslandi og endar þar í vösum íslenska ríkisins og íslenskra skattborgara.
Ég nefni þetta bara sem dæmi af því að þú virðist hafa ofurtrú á því að það þurfi “hráefni” til þess að geta lifað.
Það var rétt í iðnaðarsamfélögum síðustu aldar og er rétt í vanþróuðum samfélögum þar sem menntunarstig er lágt og þekking lítil. Í samfélögum eins og við erum með á vesturlöndum þá er vaxtabroddurinn í efnahagslífinu byggður á mannauði fyrirtækjanna og mikilvægasta hráefnið í alla framleiðslu er þekking sama hvort sem varan er einhver hlutur eins og t.d. bíll eða farsími eða einhverskonar þjónusta. Það geta flestir keypt sér stál, plast og gúmmí á heimsmarkaðverði en mjög fáir búið til úr því bíla eins og BMW gerir í München. Þannig er það í dag þekkingin sem gerir gæfumuninn, ekki hráefnið.
Ég er Hafnfirðingur og alinn upp við það að álbræðslan í Straumsvík sé máttarstólpi hafnfirsks atvinnulífs. Það er líka óumdeilt að upphaf álbræðslu í Hafnarfirði markaði þáttaskil í atvinnulífi bæjarins og einnig í efnahagslífi Íslendinga á sínum tíma. Síðan þá hefur mikið vatn runnið til sjávar. Þegar ég fór að kynna mér stækkunarhugmyndirnar í Straumsvík fyrir rúmu ári blasti við mér allt annar raunveruleiki en ég hafði átt von á. Við mér blasti með eindæmum eigingjörn starfsemi sem á sér enga aðra líka í bænum.
Hér eru nokkrar staðreyndir sem ég datt um þegar ég fór að skoða málið:
- Á þeim 40 árum sem fyrirtækið hefur starfað í bænum hafa aðeins þrjú fyrirtæki orðið til í bænum vegna starfsemi álbræðslunnar.
- Heildarinnkaup Alcan hjá hafnfirskum fyrirtækjum er 1,3 milljarður á ári en það samsvarar u.þ.b. ársútgjöldum 350 heimila í bænum (það eru 7.300 heimili í Hafnarfirði).
- Ábatinn fyrir Hafnfirðinga er lítill. Heildartekjur Hafnarfjarðarbæjar af álbræðslunni eru 70 milljónir á ári. Alcan greiðir fyrir notkun á höfninni en greiðir engin fasteignagjöld til bæjarins eins og önnur fyrirtæki í bænum þurfa að gera.
- Mengunaráhrif bræðslunnar ná langt út fyrir lóðamörk. Þannig þarf fyrirtækið 10 ferkílómetra mengunarsvæði sem liggur í suðurátt frá verksmiðjunni. Til samanburðar er allt byggt land í Hafnarfirði í dag 12 ferkílómetrar. Á mengunarsvæðinu má ekki byggja íbúabyggð eða stunda matvælaiðnað svo lengi sem bræðslan stundar sína starfsemi. Hafnfirðingar eiga mjög takmarkað byggingaland. Við höfum misst matvælafyrirtæki úr bænum eins og t.d. Góu vegna þess að við eigum ekki lóðir fyrir þannig fyrirtæki. Fyrir þessi álög á verðmætu landsvæði greiðir álbræðslan ekki krónu. Sól í Straumi vill að Hagfræðistofnun Háskóla Íslands verði fengin til að meta þennan fórnarkostnað fyrir Hafnfirðinga.
- Ábatinn af álbræðslu er fyrir íslenskt samfélag lítill. Sáralítil arðsemi er af Landsvirkjun þrátt fyrir að aðalhráefnið íslensk náttúra sem verið er að fórna sé þar ekki reiknuð inn sem kostnaður. Aðalhráefnið súrál þarf að flytja inn frá fjarlægum löndum og hagnaðurinn af starfseminni (u.þ.b. 4 milljarðar á ári í Straumsvík) rennur eðlilega til erlendra eiganda verksmiðjunnar og telst því ekki sem ábati okkar samfélags.
- Í álbræðslunni vinna 230 Hafnfirðingar og hélt ég að það væri mikill fjöldi þangað til ég komst að því að það eru u.þ.b. 9.000 störf í Hafnarfirði í dag og vinnumarkaðurinn hefur vaxið sl. 7 ár um 240 störf á ári án þess að álbræðslan hafi stækkað. Í álbræðslunni er verið að borga ófaglærðum góð laun en það má fyrst og fremst rekja til þess að þar er verið að vinna erfið störf við erfiðar aðstæður (vaktavinna, líkamlegt álag).
Í mínum huga er það landnotkunin sem vegur þyngst gegn stækkunaráformunum. Ef Alcan fær ekki þessa stækkun er líklegt að félagið leggi niður starfsemi í
Straumsvík á næstu 10-20 árum. Vermæti byggingalands í jaðri höfuðborgarinnar er orðið mjög mikið í dag (Norðlingaholt 50 milljónir hektarinn, Kópavogur 60 milljónir hektarinn). Landsvæði sem er í höfuðborginni í nágrenni við höfn en aðeins 15-20 akstursmínútur frá alþjóðaflugvellinum verður eitt það verðmætasta á höfuðborgarsvæðinu. Mig langar að sjá blandaða byggð í Straumsvík. Iðnaðarsvæði í kringum höfnina og síðan íbúabyggð, verslun og þjónustu bæði við ströndina og uppaf Straumsvík í suðurátt. Fyrir fyrirtæki framtíðarinnar eins og t.d. Marel (í dag 400 starfsmenn í Garðabæ, 800 starfsmenn í útlöndum, ábati fyrir íslenskt samfélag margfaldur á við Alcan í Straumsvík, engin mengun utan lóðar) verður þetta eftirsóttasta byggingaland á Höfuðborgarsvæðinu.
Ef hinsvegar verður af stækkun þá framlengjum við álög mengunarsvæðisins um 50-60 ár. Við höfum fengið smjörþefinn af því hvernig fyrirtæki sækja inná mengunarsvæðið í dag. Starfsmaður Umhverfisstofnunar sagði að þarna væri staður fyrir “mesta drulluiðnað á Íslandi”. Nú þegar erum við komin með steypustöð, brotajárnsvinnslu, sinkhúðun og tvær malbikunarstöðvar inná þynningarsvæðið. Byggingalandið okkar í Hafnarfirði er mjög takmarkað, þegar búið verður að byggja upp Vallarhverfið og Áslandshverfið er pláss fyrir íbúabyggð í bænum uppurið. Bærinn okkar sem í dag er með 8 ferkílómetra íbúabyggð og 4 ferkílómetra fyrirtækjabyggð verður dæmdur til þess að vaxa nær eingöngu undir iðnaðarsvæði í framtíðinni.
Virðingarfyllst og með kveðju,
Pétur Óskarsson
January 4th, 2007 at 22:27:07
Af hverju þarf Sól í Straumi að vera að birta skoðanir þeirra sem styðja stækkun á forsíðu? Geta þeir ekki bara stofnað sína eigin vefsíðu frekar en að vera með einhver fáránleg pistlaskrif hér um að þeir sem eru á móti stækkun séu um leið á móti allri verkamannavinnu?
January 5th, 2007 at 12:05:45
Mér finnst það bera mikinn keim af þröngsýni hjá ofangreindum Þórði ef hann telur að þessi annars ágæta vefsíða rúmi bara einlitar skoðanir. Ég tek það fram að ég er búsettur erlendis en þá ég flyt heim getur Hafnarfjörður allt eins orðið fyrir valinu, óháð því hvort að álverið verður stækkað eður ei. Ég er hlyntur álframleiðslu en fylgist með þessari heimasíða vegna trúar minnar á að hér geti öfgalaus skoðannaskipti farið fram hjá bæði stuðningsmönnum og þeim sem hugnast stækkunin síður.
January 5th, 2007 at 17:11:21
Ég er fylgjandi öfgalausum skoðanaskiptum og því að allir segi það sem þeim býr í brjósti. Mér fannst bara dálítið kyndugt að sjá fyrirsögnina „Ég mun segja JÁ og aftur JÁ“ efst á heimasíðu samtaka sem eru andvíg stækkun álversins í Straumsvík. Mér fyndist fara betur á því að svoleiðis skoðanir kæmu bara fram í athugasemdakerfinu (sem er einmitt til þess ætlað að fram geti farið öfgalaus skoðanaskipti) eða inni á einhverri undirsíðu sem væri sérstaklega helguð athugasemdum fylgjenda stækkunar og svörum við þeim.
Fyrir mér er þetta sem sagt spurning um framsetningu. Sól í Straumi finnst mér ekki þurfa að veita öllum skoðunum sama vægi enda ekki hlutlaus aðili. Fylgjendur stækkunar geta vel stofnað sína eigin síðu frekar en að birta aðsendar greinar á forsíðu samtakanna Sól í Straumi.
Annars er það auðvitað Sólar í Straumi að ákveða hvernig hún hefur sína heimasíðu þannig að ég ætla ekki að hafa um það fleiri orð.
Að lokum vek ég athygli á örstuttum pistli sem ég skrifaði inn á heimasíðu Ungra jafnaðarmanna í Hafnarfirði (þar sem aldrei verða birtar aðsendar greinar eftir sjálfstæðismenn!) sem snertir þessi stækkunarmál:
http://www.mir.is/index.php?grein=614&c=1
January 9th, 2007 at 01:45:12
held að stækkun muni auka fjölbreitileikan hér á völlunum, mörg fyrirtæki munu vilja koma hingað, en kannski viljum við bara lóðir undir íbúðir en ég vill atvinnu, svo hraunið undir atvinnu og stækkað álver
February 24th, 2007 at 07:35:23
Í eftirfarandi frétt af RUV er ágætis yfirlit yfir mengunaraukningu sem hlýst af stækkun álversins í Straumsvík. Hún Guðrún Þóra Magnúsdóttir umhverfisleiðtogi hjá Alcan talaði um þetta á fundi hjá Samtökum atvinnulífsins. Í fréttinni segir að losun gróðurhúsalofttegunda eftir stækkunina muni nema 740.000 tonnum á ári sem er meira magn en öllu losun gróðurhúsaloftteguna sem stafaði af samgöngum í Íslandi árið 2004.
Þetta er nú ekkert smáræði!!
Gerðuð þið ykkur grein fyrir þessu?
“Fyrst birt: 31.01.2007 12:10
Síðast uppfært: 31.01.2007 20:07
Stækkað álver mengar helmingi meira
Mengun af völdum gróðurhúsalofttegunda frá álverinu í Straumsvík verður jafnmikil eftir stækkun og af öllum samgöngum í landinu. Stækkunin rúmast þó innan viðmiða Kyotobókunarinnar. Þetta kom fram á fundi sem Samtök atvinnulífsins héldu um stækkun álversins í morgun.
Hafnfirðingar greiða að líkindum atkvæði um stækkun álvers Alcan í Straumsvík hinn 31. mars næstkomandi. Alcan vill stækka álverið og auka framleiðsluna úr 180.000 tonnum í 460.000 tonn á ári. Margir eru þó uggandi um að stækkað álver stingi í augu og mengi umhverfið meira en það gerir í dag. Guðrún Þóra Magnúsdóttir, umhverfisleiðtogi Alcan á Íslandi, fjallaði um mengunina á fundi hjá Samtökum atvinnulífsins í morgun. Þar kom meðal annars fram að umhverfisáhrif álversins væru fyrst og fremst flúoríð, svifryk, brennisteinstvíoxíð og gróðurhúsalofttegundir sem bærust út í andrúmsloftið með útblæstri.
Úrgangur frá álframleiðslunni eru kerbrot sem mulin eru innan úr kerum álversins og urðuð í flotgryfjum í fjörunni við álverið. Bæði flúor og blásýra eru í kerbrotunum en Guðrún segir þau að mestu gerð skaðlaus við urðunina svo sprækur og pattaralegur kræklingur þrífist í flotgryfjunum.
Guðrún segir að flúorlosun í útblæstri aukist í 230 tonn á ári verði stækkun álversins að veruleika. Hún verður því meira en tvöfalt meiri en árið 2005. Lítið flúor mælist þó eftir sem áður í laufi og grasi umhverfis álverið. Fram hefur komið að álverið losi meira en fjórðungi meira brennisteinstvíoxíð eftir stækkunina en það gerir í dag. Svifryk frá álverinu meira en tvöfaldast, úr 150 í 360 tonn á ári eftir stækkun en verður þó áfram undir heilsuverndarmörkum og þeirri rykmengun sem bílaumferð veldur yfirleitt á höfuðborgarsvæðinu.
Losun gróðurhúsalofttegunda eykst hins vegar mjög úr tæpum 300.000 tonnum á ári í allt að 740.000 tonn á ári eftir stækkun. Það er örlítið meira en öll losun gróðurhúsalofttegunda sem stafaði af samgöngum á Íslandi árið 2004.”
March 16th, 2007 at 16:24:10
Humm. hvað er verið að hugsa?
Ég er starsmaður þar og er búinn að vera þar í tæp 10 ár.
Árið 1997,Guð minn góður það var einga vinnu að fá, á þessu ári hefði verið fínt kosnigaár ef kosið hefði verið þá.
Um það bill 1000 manns sóttu um vinnu ,3 skálin var nýr og ég var einn af þeim fékk vinnu .
Tiðarandi var töluvert öðruvisi þá en nú.
-um það mill 1000 islendingar sóttu um vinnu þá ekki pólverjar eins og sumir vilja halda
-ef kosið hefði verið þá er það nokkuð ljóst að það hefði verið samþykkt