Ef verður af stækkunaráformum í Hvalfirði og í Hafnarfirði mun mengunin verða umtalsverð á svæðinu þrátt fyrir góðar mengunarvarnir. Í staðviðri á brennisteinsloftmengun á svæðinu frá Grundartanga til Straumsvíkur eftir að tvöfaldast verði af stækkun þessara álvera. Ætla má að hættuástand skapist á þessu svæði (SO,2 + vatn=Brennisteinssýra).

Fjölhringa kolvatnsefni (PAH-efni) eru mörg hver krabbameinsvaldandi og þar með skaðleg mönnum og dýrum. Gert er ráð fyrir að 680kg af krabbameinsvaldandi PAH-efnum berist árlega frá verksmiðjunni í Hvalfirði eftir stækkun. Hvalfjörður er nú þegar orðinn ókræsilegur á að líta.

Gangi eftir þær byggingar á álbræðslum sem nú eru í umræðunni svo og þær stækkanir á þeim álverum sem fyrir eru þá stefnir í 20.000 tonna heildarlosun á SO,2 á Íslandi. Faxaflóasvæðið á þá eftir að verða helsta mengunarsvæðið á Norðurlöndum. (fyrrverandi starfsmaður hjá Alcan í Straumsvík, oktober 2006)

“Stór hluti eða allur sá ávinningur sem áunnist hefur á sl. 30 árum með bættum mengunarvörnum fer fyrir lítið með stækkuninni. Við hverfum áratugi aftur í tímann!” (íbúi í Hafnarfirði, oktober 2006)

Sendu Sól í Straumi rök þín með eða á móti stækkun.

“Ég vil að stóriðjufyrirtæki greiði eðlilegt gjald fyrir orku, aðstöðu og mengun, ásamt því að greiða sama tekjuskatt af hagnaði og önnur fyrirtæki” (íbúi í Hafnarfirði, oktober 2006)

“Það er a.m.k. ljóst að með stækkun yrðu allar hugmyndir um að efla sjálfbæra þróun og “grænar” áherslur í Hafnarfirði hálf hjáróma - þá gæfist einungis kostur á skipulegu undanhaldi í umhverfismálum en engum framförum” (íbúi í Hafnarfirði, oktober 2006)

“Með stækkuninni er verið að festa í sessi þá ímynd að Hafnarfjörður sé verksmiðjubær - málmbræðslubær. Spyrja má hvort það sé vilji bæjarbúa - og hvort það fellur að þeirri sjálfsmynd og þeirri markaðssetningu á ímynd bæjarins sem byggð hefur verið upp undanfarin ár eins og  bærinn í hrauninu, álfabyggðir,  víkingar,  gaflarinn og þess háttar. (íbúi í Hafnarfirði, oktober 2006)

“Við stöndum fljótlega frammi fyrir ákvörðun sem hefur áhrif um ókomna framtíð í bænum okkar. Að öllu óbreyttu er líklegt er að álverið verði horfið í kringum árið 2020. Ef við Hafnfirðingar hinsvegar segjum “já” verður álver í Hafnarfirði fram yfir miðja þessa öld. Ég segi “nei” við stækkun álversins vegna þess að ég á börn og barnabörn í bænum og mér er annt um bæði framtíð þeirra og Hafnarfjarðar.” (íbúi í Hafnarfirði, oktober 2006)

Sendu Sól í Straumi rök þín með og á móti stækkun álversins í Hafnarfirði.

postur@solistraumi.org

Fyrsti fundur þverpólitísks áhugahóps um stækkunarmálið í Straumsvík “Sól í Straumi” var haldinn á Ásvöllum á mánudagskvöld Óhætt er að segja að mæting hafi verið framar öllum vonum en um 150 Hafnfirðingar mættu á fundinn. Fundarstjóri var Ásgrímur Sverrisson kvikmyndagerðarmaður.

Á fundinum var lesin upp yfirlýsing frá hópnum og meðlimir hans kynntir fyrir fundargestum. Kom þar fram að hópurinn er fjölbreyttur og meðlimir hans hafa ólikar pólitískar skoðanir og sýn á stækkunarmálið. Það sem hinsvegar sameinar þetta fólk er sú afstaða að ekki sé ráðlegt að leyfa Alcan stækkun á álverksmiðjunni í Straumsvík.

Pétur Óskarsson fór síðan vítt og breytt yfir stækkunaráformin og kynnti ný kort af núverandi og væntanlegu þynningarsvæði samkvæmt starfsleyfi Alcan til ársins 2020 sem hægt er að skoða hér á síðunni. Pétur nefndi svo til sögunar ýmis rök gegn stækkun og velti upp spurningum sem hann telur vert að skoða. Í lok máls síns nefndi hann líka rök sem mæla með stækkun álversins og undirstrikaði að hópurinn Sól í Straumi vldi skoða málið frá öllum hliðum. (sjá glærusýningu hér til vinstri á síðunni)

Á eftir Pétri tók Valgerður Halldórsdóttir til máls og fór yfir ýmis rök gegn stækkun sem hópurinn hefur viðað að sér frá bæjarbúum undanfarið. Hún lagði fram lista með rökum og bað gesti um að bæta við rökum bæði með og á móti á þartilgerð eyðublöð sem gengu um salinn. Valgerður undirstrikaði að öll rök í þessu máli eru gild og að hópurinn legði áherslu á málefnalega umræðu um málið.

Margrét Pétursdóttir las síðan upp góða kveðju til fundarins frá óformlegum, þverpólitiskum hópi í Skeiða- og Gnúpverjahreppi sem hefur áhyggjur af virkjunaráformum í Þjórsárverum og víðar á Suðurlandi í tengslum við álbræðslur á höfuðborgarsvæðinu. Þetta minnti fundarmenn á að stækkunarmálið í Straumsvík er ekki einkamál Hafnfirðinga heldur varðar þjóðina alla.

Síðari hluti fundarins fór í umræður og fyrirspurnir þar sem Valgerður, Pétur og Gestur Svavarsson sátu í pallborði. Umræðurnar voru hressilegar og mátti heyra fjölbreytilegar raddir bæði með og á móti stækkunaráformunum.

Þetta var aðeins byrjunin á langhlaupi sem gengur út á það að ræða stækkunarmálið hér í bænum frá öllum hliðum. Það kom berlega í ljós að þörfin til að ræða þetta mál í bænum er mikil og við fögnum því mjög að Hafnfirðingar tóku þessu tilboð okkar um samræður um þetta mál eins vel og raun bar vitni.

TÖLUM SAMAN - TÖKUM AFSTÖÐU

Endilega sendið okkur ykkar rök á postur@solistraumi.org og takið þátt í umræðu hér á síðunni. Næsti fundur verður á Ásvöllum 1. nóvember 2006.

“Hvernig er flutningum á hættulegum efnum háttað, hvaða efni eru notuð, hvaðan koma þau og hvernig eru þau flutt. Hvað gæti farið úrskeiðis í flutningum eða við meðhöndlun og hvaða líkindi eru þar á?” (íbúi í Hafnarfirði, oktober 2006)

“Ég vil stækkun vegna þess að hún er skynsamleg og rennir framtíðarstoðum undir hafnfirskt atvinnulíf.” (íbúi í Hafnarfirði, oktober 2006)

“Það vantar að koma upplýsingum skýrt til almennings og þá aðallega nágranna álvers um rannsóknir tölfræði og almennt eftirlit heilbrigðiseftirlits” (íbúi í Hafnarfirði, oktober 2006)