Það er undarlegt að ekkert hefur heyrst frá stjórnendum bæjarins um þau verkefni sem nú liggja fyrir í framhaldi af kosningunni um stækkun álversins í Straumsvík þann 31. mars sl. Í ljósi niðurstöðunnar blasa við ýmis verkefni sem þarf að ganga í og klára og vil ég hér benda á nokkur:

1. ganga þarf frá lóðamálinu. Hafnarfjarðarbær þarf að fá aftur til ráðstöfunar lóðina sem Alcan hafði keypt undir stækkun. Bærinn þarf á þessari lóð að halda í framtíðinni undir atvinnustarfsemi og engin ástæða til að draga á langinn að ganga frá því. Það er nokkuð víst að verðmæti lóðarinnar hefur margfaldast frá því að hún var seld en rétt er að leggja öll spilin á borðið og útskýra fyrir bæjarbúum af hverju Alcan fékk að kaupa þessa nýju lóð undir stækkun sem eignarlóð árið 2003. Álverið sjálft stendur á leigulóð í dag og hvorki bæjarbúar né önnur hafnfirsk fyrirtæki fá að kaupa eignarlóðir í bæjarlandinu. Lesa afganginn af þessari færslu »

Það hefur ýmislegt verið rætt og ritað um framhaldið í Hafnarfirði eftir að Hafnfirðingar höfnuðu stækkunaráformum álrisans Alcan þann 31. mars sl. Það hefur hinsvegar lítið fréttnæmt verið í umræðunni um þetta mál og Alcan á Íslandi hefur ekki látið hafa neitt bitastætt eftir sér um málið.

Það voru hinsvegar tíðindi sem Viðskiptablaðið flutti um þetta mál í gær en þar var vitnað beint í Lúðvík bæjarstjóra:

“Við höfum heyrt það hjá ráðmönnum Alcan að þeir eru enn að meta niðurstöðu kosningarinnar og meta stöðu sína í málinu. Um leið eru þeir að skoða hvaða leiðir eru færar. Þeir eru með þessa raforkusamninga og vilja vita hvaða tækifæri eru í þeim efnum. Það er ekkert sem útlokar að þeir vinni frekar með sínar deiliskipulagstillögur. Það er ekkert leyndarmál. Það var felld hér ákveðin tillaga en það er ekkert sem bannar mönnum að leggja málið fyrir með nýjum hætti til frekari skoðunar”

og síðar í greininni vitnar VB aftur beint í Lúðvík:

“Við höfum hins vegar sagt að bæjaryfirvöld myndu ekki að fyrra bragði taka upp þessa deiliskipulagsvinnu og láta kjósa um hana á þessu kjörtímabili. Alcan hefur allt frelsi til að skoða sín mál og vinna sínar hugmyndir og leggja þær fyrir til umræðu og kynningar. Auðvitað myndum við fara yfir það.” (heimild: Viðskiptablaðið 9. maí 2007, forsíða)
Lesa afganginn af þessari færslu »